Friday Ziyarat

جمعہ کے دن امام زمانہؑ کی زیارت سلام ہو آپ پر اے زمین پر اللہ کی حجت، سلام ہو آپ پر اے مخلوقات میں اللہ کی آنکھ (نگران)، سلام ہو آپ پر اے اللہ کے وہ نور جس کے ذریعے ہدایت پانے والے ہدایت پاتے ہیں اور جس کے ذریعے مومنین کی مشکل کشائی کی جاتی ہے، سلام ہو آپ پر اے پاکیزہ صفت اور (خدا سے) خوف رکھنے والے، سلام ہو آپ پر اے خیر خواہ سرپرست، سلام ہو آپ پر اے نجات کی کشتی، سلام ہو آپ پر اے زندگی کے چشمے، سلام ہو آپ پر، اللہ کی رحمتیں ہوں آپ پر اور آپ کے پاک و پاکیزہ اہل بیت پر، سلام ہو آپ پر، اللہ جلد فرمائے آپ کے لیے اس نصرت اور ظہورِ امر کو جس کا اس نے آپ سے وعدہ کیا ہے، سلام ہو آپ پر اے میرے مولا! میں آپ کا چاہنے والا ہوں اور آپ کے اول و آخر کی معرفت رکھنے والا ہوں، میں آپ کے اور آپ کے اہل بیت کے وسیلے سے اللہ تعالیٰ کا قرب حاصل کرتا ہوں، اور آپ کے ظہور کا اور آپ کے ہاتھوں حق کے آشکار ہونے کا انتظار کرتا ہوں، اور میں اللہ سے سوال کرتا ہوں کہ وہ محمد اور آلِ محمد پر درود نازل فرمائے، اور مجھے آپ کا انتظار کرنے والوں، آپ کی پیروی کرنے والوں اور آپ کے دشمنوں کے خلاف آپ کا ساتھ دینے والوں میں قرار دے، اور آپ کے حضور آپ کے دوستوں کے زمرے میں جامِ شہادت نوش کرنے والوں میں شامل کرے، اے میرے مولا! اے صاحبِ زماں! اللہ کی رحمتیں ہوں آپ پر اور آپ کے اہل بیت پر۔ یہ جمعہ کا دن ہے اور یہ آپ کا دن ہے جس میں آپ کے ظہور کی امید کی جاتی ہے، اور اس میں آپ کے ہاتھوں مومنین کے لیے کشائش (فرج) اور آپ کی تلوار سے کافروں کی ہلاکت متوقع ہے۔ اور اے میرے مولا! میں اس دن میں آپ کا مہمان اور آپ کا ہمسایہ (پناہ گزین) ہوں، اور آپ اے میرے مولا! سخیوں کی اولاد میں سے ایک عظیم سخی ہیں، اور آپ کو مہمان نوازی کرنے اور پناہ دینے کا حکم دیا گیا ہے، پس میری مہمان نوازی فرمائیے اور مجھے پناہ دیجیے، اللہ کی رحمتیں ہوں آپ پر اور آپ کے پاکیزہ اہل بیت پر۔